|
|
الحلم
بــــوقت من البطا وبليل تتراقص شياطينه
بعـــد شفت الضيا ينزع من ثياب المسا ثلثين
تحايلت المنام الي مثل بيتك تمرينه
وانا الي من تفارقنا وانا ما غمضت لي عين
غريبة كل حلم يمر فرقادي تزورينه
والاغرب كيف احلم الحلم وارجع واحلمه بعدين
قبل يومــين شفتك فالمنام وقمت من حينه
ونمت امــس ورجع نفس المنام الــي قبل يومين
انا الي قبل اسافر شلت قلبي من شراينة
تركته في يدك مثل الامانة واحفظيها زين
ترى حفظ الامانة دين مجبورة تردينة
اجل مافي احد قد قالك حفظ الامانة دين
مرد المقفي بيلفي ويستوفي وتوفينه
بعد ليلة ثلاثة اربعة عشرة شهر شهرين
اذا انتي منتي بقد الكلام الي تقولينه
حرام استامنك حاجة واذا جيت اطلبك تنسين
تخونين وتبين ارضى واحد يرضى تخونينيه
انا لاجيت اخونك مع حبيبة ثانية ترضين
من اول مارجعت من السفر ماشفت لك بينة
وانا الي كنت احسبك قبل ادوس ارض المطار تجين
تكونين انتي اول شخص عيني تحتضن عينه
وكنت اتخيلك من زود فرحة رجعتي تبكين
واشوف بدمعتك حكيك واعرفه قبل تحكينه
واجيب احلا من الي بتحكينه واتركك تحكين
تقولين الوطن نور واقول بنور مضوينه
تقوليلي غديت احلى واقول عيونك الحلوين
كلام نام بشفاهك وخفتي لا تصحينه
ذخرتيه لغرام الي ينام ويتركك تصحين
تغانمتي غيابي لين رجحتي موازينه
تعلم من يدك لمس الكفوف وعلمك تجفين
وليتك لاقية به شي فيني ماتلاقينه
مهو بغرور ولاكن خابرك مالك امل تلقين
تغافلك بغلا والا الحلا ماهوبمنزينه
تزينه الصور بس الصحيح ابن الحلال زوين
وانا ماني بناقص عنه يوم انك تبدينه
نصيبي هو نصيبي لو يسددها من الصوبين
قنوع بمظهري والسم مايذبح ثعابينه
على قول المثل ملني حلو لاكن ماني شين
اذا اهداك الزهر مرة فانا اهديتك بساتينه
واذا الهاك بفرح ليلة فانا تهت لباك سنين
واذا استضعفتك املاكه وشتتك ملاينه
انا حتى فتات الخبزه اقسمها معك نصين
طموحي بس اجي واظفر بشي تستحقينه
تدينته تسلفته سرقته مو مهم منين
كأني من كثر ماارضى بكل الي تمنينه
لوانك تطلبين الله يعنيني بقول امين
انا مالعب على الحبلين وقت الطيش وسنينه
تبين الحين يوم اني كبرت العب على الحبلين
ترا عند البدو بالذات عيب الي تسوينه
حلاتك لاعشقتيني تعشقيني ليوم الدين
غرام نسكن ظلوعه حشيمة من مجانينه
جفا يجمع معزتنا ولا عشق يذل اثنين
كثار الي تحدوني وقالوا لي تحبينه
امانة لاتخليني صغير في عينهم تكفين
لاني كل ماقالو تخون اقول مسكيــنه
عليك الله وامانة علميهم منهو المسكين
انا خايف اليا طاح الجمل تكثر سكاكينه
وانا ماعادت ظلوعي تحمل طعنة السكين
مثل ماقالوا المكتوب واضح من عناوينه
لو ارحل منك للغربة بسافر من ظلامك وين
كفاية كل حلم يمر برقادي تزورينه
كفاية من تفارقنا وانا ماغمضت لي عين
قبل يومين شفتك بالمنام وقمت من حينه
ونمت امس ورجع نفس المنام الي قبل يومين
حامد زيد