|
|
الصيف
يجينا الصيف وننتظره واذا عدى نبيه ايعود
ونفرح به اذا جانا نقول الصيف لايعدّي
نحسب حسابنا بدري نفكر ف الليالي السود
نفكر كيف نستانس وكيف نجيب ونودّي
ندور للوناسة وين شباب وقدها وقدود
نسولف مع نجوم الليل ذوات المبسم الوردي
نغير موجة اللهجة حسب جنسية الموجود
مابين اشكون وعاوز ايه وشو بدك وما بدّي
بعضنا فلوسه كثيرة بعضنا بين نقص وزود
وبعضنا مسافر بسلفة وفيزة بس متحدي
يبي ينقط على هذي ويلبس ذيك عقد ورود
يضحكها وهي تضحك عشان يقول من قدي
يظن انه ملك دنياه و ودع حظه المقرود
مايدري انه بوضعه غدا في حال متردي
يفاخر بالخطايا الي تصده عن طريق الجود
يضيع نفسه بنفسه ويظن انه بعد مقدي
غلط والغلطة بعشرة لرجلٍ يعرف المنقود
خطى واكبر خطى والله اضيع نفسي بيدي
مادام ان العمر يمشي وتالي ذا الجسم للدّود
اجل بالله وش وضعي اذا حطوني بلحدي
فيصل اليامي