يابوفهد

يابو فهد لاصرت تنشد عن الحال

حالي بها ياخوك عشرين علة

لي صاحب يسوى ثلاثين رجال

كلٍ شهد وانا بعد شاهدٍ له

طيب وفي كريم في كل الاحوال

ومن عاشره اقسم قسم ما يمله

كنت اتعذر له اليا زل او عال

بيني وبينه ماتجي اي زله

ماكنت اظنه يسمع القيل والقال

الين ماقفى وانا مقبلٍ له

كشر بوجهي واحسبه ضايق البال

واقول في نفسي ماهي عادةٍ له

اثره سمع يابو فهد هرج الانذال

حطوني ابغضته وانا منصحٍ له

واليوم ابيك تحلها وانت حلال

ياسيفي الي لاتضايقت اسله

ياطيب فعلك يوم اطالع بالافعال

انا اشهد ان الي يغلك تغله

يابوفهد كن المراجل لك عيال

والطيب كنه عود وانت ولدٍ له

ابيك تنشد وش بلى صاحبي مال

رحله وشف وش به تغير وقله

كانه يبيني حاول تحل الاشكال

وكانه مقفي جعلها سفرة له

خالد المريخي